12 Ноября 2018

8 ноябрьдә Татарстан  Республикасы Дәүләт Советы       Экология,   табигатьтән   файдалану,  агросәнәгать һәм  азык-төлек  сәясәте  комитеты   утырышы  узды,  анда  2018  елның  9  аенда  «2013-2021 елларга  Татарстан  Республикасында  авыл  хуҗалыгын үстерү.  Авыл  хуҗалыгы  продукциясе,  чимал  һәм  азык-төлек  базарларын  җайга  салу»    .дәүләт  программасын  үтәү     йомгаклары  каралды. 

Чарада  Парламент  комитеты  рәисе    Таһир Һадиев, депутатлар  Хәлил Гыйниятов, Рәис Сөләйманов, Геннадий Глушков, Ирек Сәлихов, Елена Минакова,  Татарстан Республикасы  авыл  хуҗалыгы  һәм азык-төлек  министры  урынбасары  Ришат Хабипов һәм башкалар  катнашты.  Алар  шәхси  ярдәмче хуҗалыкларга  һәм крестьян - фермер хуҗалыкларына  ярдәм  итү  өчен  бирелгән грантларның  нәтиҗәлелеге,  авылда  авыл  хуҗалыгы  секторын  кадрлар  белән  тәэмин  итү  һәм  яшьләрне  авылда  калдыру, шәхси  ярдәмче хуҗалыкларның    һәм крестьян - фермер хуҗалыкларының    республиканы  авыл  хуҗалыгы  продукциясе  белән  тәэмин  итүдәге  өлеше белән  кызыксындылар.

Дәүләт программасының  үтәлеше  турындагы  мәгълүмат  белән  Татарстан Республикасы  авыл  хуҗалыгы  һәм азык-төлек  министры  урынбасары    Ришат Хабипов чыгыш  ясады.  Аның  әйтүенчә,  2018 елның  9  аенда  дәүләт  программасы  чараларын финанслау      11 млрд 112,9 млн сум  тәшкил  итә,  шул  исәптән     2 млрд 982 млн  сум  -   федераль  бюджеттан.  Тулай  продукция  күләме   162,3 млрд сумлык  булган. Шул  чорда  332,6 мең  тонна  терлек һәм  кош  ите җитештерелгән,  сөт  -    1,4 млн тонна.

Дәүләт  программасын  үтәү  кысаларында   2018 елга   республиканың  авыл  хуҗалыгы  оешмалары  тарафыннан    210 трактор, 110 ашлык  җыю комбайны  һәм  35 азык  җыю  комбайны  сатып  алу  планлаштырылган.

Ришат Хәбипов билгеләп үткәнчә,  соңгы  елларда   шәхси хуҗалыкларда  барлык  төр  хайваннар  санын  саклап  калуга  ирешелгән,  шул  исәптән сыерлар    110 мең  баш  исәпләнә.  Яшь  эре  мөгезле  терлекләр һәм  кош-корт  саны  да  арткан.  Республиканың  30    районында  савым  сыерлары  арткан. 

Төрле  юнәлешләр  буенча  шәхси  ярдәмче хуҗалыкларга      548 млн  сум  акча  бүлеп  бирү  каралган.   Авылда  күбрәк 5  һәм  8  башка исәпләнгән  мини-фермалар  актив  төзелә,  аларга    120 мең һәм  200 мең сум акча  кайтарыла.   2015-2018  елларда  шәхси хуҗалыкларда    1489 миниферма  төзелде,  аларга  республика  бюджетыннан     254 млн  сум  дәүләт  ярдәме  бирелде,  шул  исәптән    2018  елда    188 миниферма  төзүгә  29 млн сумлык  дәүләт  ярдәме  күрсәтелде. 

Ил  буенча  караганда, безнең    республикада гаилә  фермалары  иң  күп  санда  - 1220 бер.,  аларда   4 меңләп  кеше  эшли. 

Министр урынбасары  ассызыклап  үткәнчә,  боларның  күбесенә  фермерларга  бирелә  торган  грант  ярдәмендә  ирешелгән.         2012-2018  елларда    991 КФХ    2,1 млрд сумлык  грант алган.  Авыл  кешеләре   яңа  эш  башлаучы  фермерларга  һәм  гаилә  фермаларына  грант  ярдәме  программаларында  актив  катнашалар.    

2018 елда  яңа  эш  башлаучы    124   фермер һәм  46 гаилә   фермасы     562 млн сумлык  грант алдылар.  Бу  тагын  өстәмә  рәвештә    7 мең  баш  эре  мөгезле  терлек,   960 ат,   237 мең баш  төрле  кош-корт  һәм  башка төрле   йорт  хайваннары  сатып  алырга  мөмкинлек  бирә.  

Соңгы  елларда республиканың  агросәнәгать комплексында    кооперативлар төзү  буенча  актив  эш  алып  барыла.   Урыннарда   моңа   инициативалы  кешеләрне  җәлеп  итәләр,   бизнес-планнар  исәпләнә   һәм  төрле  юнәлештә    кооперативлар  төзелә.   9 айда  яңа  36   кооператив төзелгән.   Бу  эшчәнлекне  башлап  җибәрү  һәм  кооперативларны  алга  таба  үстерү  өчен  республика  бюджетыннан  5 млн.  сумга  кадәр  дәүләт ярдәме  каралган   программа   эшли башлый.  Алар бер  елдан  соң  35  млн. сумга  кадәр  грант  бирү  каралган    федераль   программада  катнаша  алалар.


Чыганак: Татарстан Республикасы авыл хуҗалыгы һәм азык-төлек министрлыгы